“ХӨВСГӨЛ – 2015” АЯЛАЛ

Нийслэлийн төрийн байгууллагуудын 2014 оны үйл ажиллагааны үр дүнд хийсэн хяналт-шинжилгээ, үнэлгээний дагуу  манай цогцолборын эвсэг, бүтээлч, найрсаг хамт олны бүтэн жилийн ажлын үр дүн гарч бид “БҮРЭН ХАНГАЛТТАЙ” үнэлгээ мөнгөн шагнал, “Батламж”-ын хамт шагнуулсан нь цаашид хииж бүтээх урам зориг бадраасан сайхан үйл явдал болсон билээ.

Хамт олноороо хэлэлцэн шагналынхаа мөнгөөр “МОНГОЛЫН ЩВЕЙЦАРЬ” хэмээн нэрлэгддэг, цэнхэр сувд ХӨВСГӨЛ далай руу аялахаар шийдэн зуны дэлгэр цагаар 2 группэд хуваагдан аялсан юм.

Хөгжилтэй, наргиантай бас хүмүүсийн нуугдмал авьяас илэрсэн дуутай хууртай дурсах зүйлтэй, хамт олныг нэгдүүлж чадсан гайхамшигтай аялал болж ажиллагсад маань эрүүл агаар, байгалийн сайханд магнай тэнэгэр, сэтгэл хангалуун аялцгаан далай ээжийнхээ усанд булхан дараа жил хаашаа явахаа төлөвлөн сайхан амраад ажилдаа орцгоож байна.

Аялалын группуудын ахлагч нарт талархахын хамт аюулгүй байдал, техникийн бүрэн бүтэн байдлыг ханган ажилласан жолооч Б. Амарсанаа, Б. Хүрэлхүү нартаа алтан шар зам нь үргэлж өлзийтэй байхын ерөөлийг хамт олныхоо өмнөөс өргөн дэвшүүлье.

Дэлгэр Монгол орныхоо тоолоод баршгүй, үзээд ханашгүй байгалын үзэсгэлэнт газруудаар дахин дахин аялан амрахаар төлөвлөж байгаа хамт олны маань хүсэл зорилго биелнэ гэдэгт баттай итгэн энэ удаагийн аялалын зургаар дурсамжаа өндөрлөж байна.