“Халуун сэтгэл” сайн үйлсийн аяныг зохион байгууллаа

Ахмадын баярыг угтаж төвийн залуучуудын зөвлөлөөс санаачлан багш нарынхаа хамтаар Батсүмбэр суман дахь Ахмадын асрамж хөгжлийн төвд очиж “Халуун сэтгэл” сайн үйлсийн аяныг амжилттай зохион байгууллаа.

 Уг сайн үйлсийн аяныг “Хүн - Хүний төлөө” Үсчин гоо сайхны академитай хамтран нийт 60 хүний бүрэлдэхүүнтэй хамтарсан багаар зохион байгуулсан ба бидний аяныг дэмжигч байгууллагаар “Очирдагинас” ХХК ажиллаж ахмадуудад өдрийн хоолны зайдас, хиамыг бэлэг болгон өгч ахмадуудаа баярлууллаа. Энэхүү үйл ажиллагаагаар төвийн залуус 7 баг болон хуваагдаж тэдний өрөө тасалгаа, нийтийн эзэмшлийн талбайд цэвэрлэгээ үйлчилгээ хийж, асаргаа үйлчилгээ үзүүлж өөрийн аав ээжээс өөрцгүй тусалж дэмжин баярлуулсан.

“Хүн - Хүний төлөө” Үсчин гоо сайхны академийн хамт олон ахмадуудын үсийг засах, массаж бариа засал хийх, гоо сайхан, маникюрын үйлчилгээ үзүүлэх зэргээр олон төрлийн үйлчилгээ үзүүлж ахмад буурлуудаа нэг өдөр халуун сэтгэлээр баярлуулж сайн үйлс бүтээсэн. Мөн залуус маань ахмадууддаа зориулан урлагийн тоглолт үзүүлж нийтийн бүжиг зохион байгуулсан нь тэдний сэтгэлд нийцсэн сайхан ажил боллоо. Энэ үйл ажиллагаанаас төвийн залуус бусдыг хайрлах, энэрэх, ахмад настнаа хүндэтгэх, хэн нэгнийг баярлуулах сэтгэлийн бэлэг хүнд хамгийн чухал байдгийг ухаарч ойлгосон үр дүнтэй ажил боллоо. 

Бидэнтэй хамтран ажиллаж ахмадуудыг чин сэтгэлээсээ баярлуулан буян үйлдсэн “Очирдагинас” ХХК-ы хамт олон, “Хүн - Хүний төлөө” үсчин гоо сайхны академийн хамт олонд халуун талархал илэрхийлье.